يوميات مدمن

يوميات مدمن
يارب تدينا القوه وقلوبنا تنضف من جوه
وتبقى بالحب ملانه
وفقنا دايما وأسعدنا ونحل مشاكلنا بايدنا
ومصر تفضل عمرانه
لما العيال يشبطوا فيا ويحبوا يتمشوا شويه
بعملهم زي الاراجوز
وأفضل أداري على الفاكهه من خوفي لعيالي تشوفها
وغيري بيقلب في الموز
سبع عيال هدين حيلي وزهقت في نهاري وليلي
ومنين هلاحق عالطلبات
الأيد قصيره ومش طايله وبقيت أنا الحيطه المايله
وعيالي شاطره في قولة هات
قايم ونايم بالعافيه وحلمي زاد جابلي الكافيه
وعشتي صبحت منكوبه
آسيت ومليت في حياتي وحالتي تعبانه يوماتي
وكل نوبه بقول توبه
الكيف لوحده خرب بيتي أخرتها هيسبب موتي
والغلب طالع من عيني
الخمر شعلل ادماني هو اللي زود حرماني
وجيوبي أنضف من الصيني
وشفت منظر حطمني أصغر ولادي يقلني
ساعتها فقدت احساسي
وقلت توبه يارب سماح توبه نصوحه كابوس وانزاح
وبقيت أصلي كل آدان
الفضل لله نورني والكل بقى بيقدرني
وأرتحت من ذل الأدمان